《英雄聯盟League-of-Legends》開發商Riot 日前公布咗新嘅可用英雄，佢就係有「血港開膛手」之稱嘅Pyke，喺佢身上又可以搵到啲乜野嘅招式呢？而家就簡單介紹吓！
作為一隻近戰嘅英雄角色，Pyke嘅打法唔算太埋身，感覺上個定位似輔助同擊殺之間，皆因佢有嘅4招主動技都係以減低對方能力同快速移動，但係只要將手上嘅技能運用得宜，例如E+Q，就有機會做到「無限Q Combo」！呢隻角色幾時有得用？咁就要將遊戲程式更新到8.11版本啦。
Pyke 嘅被動技 – 「Gift of the Drwoned Ones」可以喺對方英雄睇唔到自己嘅情況下，快速回復一定嘅HP，混戰緊就可以行入草叢位緊急回血再打過！除咗回血之外，滿血嗰陣仲可以轉化做額外攻擊力，而且可以疊加道具同隊友嘅技能效果，快速清場無難度！
跟住就要講吓主動技，Q嘅技能「Bone Skewer」可以減慢對方嘅行動，或者將對方拉過嚟；屈機嘅係，將對方拉過嚟呢下係無視地形效果，兼且用嗰時都會將對手拉到同樣嘅距離，換言之將對手拉入自己嘅攻擊範圍就可以任你魚肉……或者比人魚肉番轉頭。
W技「Ghostwater Dive」可以喺水入面快速移動，簡單啲講就係喺有水嘅範圍加快行走速度，對手追唔到之餘，配合被動技仲可以回到血，走佬一定要用！
當使用E技「Phantom Unertow」就要有啲技巧同先讀意識，皆因呢招使出嗰陣會出現殘影並且直線移動，當殘影返到角色嗰時，受到攻勢嘅對手就會扣血同暈眩，係一招用得好嘅話，就可以協助隊友不斷拎Kill嘅招式。
大技R技《Death from Below》會跳到點擊嘅位置，同時以X形方向造成傷害，當用呢招而成功擊殺嘅英雄嗰時，仲可以繼續用呢招攻擊，直到世界終結時…唔係，係對手都比你殺晒嗰時！
