有外國網站推介咗一款「最好的廉價電腦鍵盤」，相信都幾好奇究竟講緊邊款？
呢個其實唔算難估，就係Corsair嘅K55 Gaming Keyboard；K55推出市面都已經一年半，不過就有三個大優勢：平價，有RGB背光同靜！平價唔使點解釋嘅，加埋RGB背光，$500左右有交易，真係點到你唔服？
講到靜呢一點，皆因K55唔係用一貫嘅機械軸，而係用薄膜式，對於只可以深夜先打到機嘅Gamer嚟講，唔使驚會嘈到屋企人。除咗以上三點，佢仲有6個自定義巨集鍵，方便Gamer自行設定；右上方嘅音量控制亦都可以隨時調較合適嘅音量；仲有樣野係而家嘅Keyboard絕少有跟到，就係有手枕！唔好睇少個手枕，試諗下操機閒閒地無四、五個鐘都唔停，有個手枕托住個重量係舒服啲嘅！
Corsair K55 Keyboard仲可以喺各大電腦商店買到，如果唔想出門口……又唔介意畀多少運費嘅話，Amazon幫到你。
