為夢想可以去到幾盡？洋紫荊YTK戰隊中嘅幾位年青人就為咗打機連份工都辭埋，作咁大犧牲，無非都係唔想錯失代表香港出戰嘅機會。有啲嘢宜家唔做，可能一輩子都唔會再做！
「2018王者榮耀冠軍盃國際邀請賽」將於今日（1/8）正式展開，洋紫荊YTK戰隊係唯一一支能夠打入比賽嘅香港區隊伍。一班有同樣志向、同樣熱愛打機嘅人，為咗追夢而聚埋一齊，然後一同踏上夢寐以求嘅大賽舞台，對YTK嚟講係一件既令人感動又熱血嘅事！喺無教練，咩都要靠自己嘅情況下，用兩年幾嘅時間能夠行到今日呢一步，證明「nothing is impossible」！
不過追夢嘅背後，隊員們都犧牲咗唔少，為咗配合上海嘅賽前集訓，不惜打爛自己飯碗，辭去原本嘅工作，賽事結束後，佢哋返到嚟要面對嘅可能係前路茫茫。但無論比賽係贏定輸，YTK已經賺咗，因為喺上海集訓嘅呢段期間，佢哋幾乎每日同唔同嘅戰隊去對戰，一步一步改善自己嘅不足，又喺教練桃哥身上學到唔少戰術，短短嘅一個月已經抵上喺香港嘅一年，對於自己進步神速，佢哋都感到好驚訝，而呢次嘅磨練同經歷，對佢哋嚟講絕對係上咗寶貴嘅一課！
今次嘅比賽只係YTK嘅一個起步點，佢哋認為電競喺香港發展係有一定嘅困難，在於香港人比較著重眼前嘅利益，如果你無喺大賽贏過，無賺到錢，根本唔會有人理你，而未來想行更遠嘅路，就真係好需要得到政府或者市場嘅大力支持同贊助。
洋紫荊YTK戰隊喺首輪淘汰賽將對上韓國隊伍GO，到底佢哋可唔可以逆襲成功？大家就要留意今日嘅揭幕戰！
資料來源：pvp.qq.com
